တွတ်ပီ
သူ့နာမည်က တွတ်ပီတဲ့။ ပိန်ပိန် သေးသေးလေး။ ကျနော် ငယ်ငယ်က အတိုင်းပဲ။ နာမည်အရင်းတော့ မသိတော့ဘူး။ တစ်ခါတော့ ကျနော်ကို ပြောဖူးတယ်။ ဒါပေမဲ့ မေ့သွားပြီ။ ဆိုတော့ သူ့သူငယ်ချင်းတွေ ခေါ်သလို ကျနော်လည်း တွတ်ပီပဲ ခေါ်တော့တယ်။
တွတ်ပီနဲ့ စသိတာ august 2021။ နိုင်ငံရေးအခြေအနေကြောင့် ကျောင်းတွေပိတ်ထားတော့ တွတ်ပီတို့တွေ လမ်းပျော် ဖြစ်နေခဲ့တဲ့ အချိန်တွေပေါ့။ တစ်ရက် ကျနော် ရေဆင်းကူးတော့ သူကို ကမ်းစပ်မှာ ကျနော့် စိတ်အထင် အရှည်သုံးတောင်လောက်ရှိမဲ့ ဖေါ့ပြားနဲ့ တစ်ယောက်ထဲ လိူင်းစီးနေတာတွေ့တယ်။ မိုးတွင်းကလ ဆိုတော့ လိူင်းတွေက ရှယ်ကြီးတာ။
နောက်ရက်တွေ မှာလည်း သူကို ဖေါ့ပြားနဲ့ ပြန်တွေ့တယ်။ တစ်ရက်တစ်လေ သူ့ဘော်ဒါတွေ့နဲ့။ တစ်ရက်တစ်လေ တစ်ဗွေထဲ။ တွေ့တာကြာတော့ သူနဲ့ မျက်မှန်းတန်းလာတယ်။ မျက်မှန်းတန်းလာပြီး နောက်တွေ့ရင် ကျနော်တို့ တစ်ယောက်ကို တစ်ယောက် ပြုံးပြလာကြတယ်။
တွတ်ပီနဲ့ ရင်းနှီးသွားတဲ့ တစ်ရက်ရှိတယ်။
အဲ့နေက ထူးထူးဆန်းဆန်း ငါးဖမ်းစက်လှေ တစ်စီး ရောက်လာတယ်။ တွတ်ပီက သူနဲ့သက်သူရွယ်သူတွေ၊ သူ့ထက်ငယ်တဲ့ ကလေးတွေနဲ့ လှေပေါင်းမိုးပေါ်ကနေ ရေထဲကို တစ်၊ နှစ်၊ သုံး အော်ဆိုပြီးခုန်ချနေကြတာ။ ကျနော်လည်း ကလေးဆိုးကြီး လုပ်ပြီး သူတို့နဲ့ သွားပေါင်းတယ်။ သူတို့နဲ့အတူတူ ရေထဲ ခုန်ချတယ်ပေါ့။ မရဲတဲ့ ကလေးတွေကို ရေထဲခုန်ချဖို့ မြှောက်ပေးတယ်။ ပြသာနာက ရေကသူ့တို့အတွက် နက်ပေမဲ့ ကျနော်အတွက်တော့ တော်တော်ကို တိန်တယ်။ ဆိုတော့ ခုန်ချရင် ကျနော် အမြဲ ဖင်ထိုင်ကျတယ်။ ဒါပေမဲ့ ပျော်ဖို့ကောင်းခဲ့တယ်။
တစ်နေ့ ကျနော် ကယက်လှေ (kayak) စီးတယ်။ တွတ်ပီအပါအဝင် ကလေးတွေ အများကြီးပဲ။ စီးချင်ကြတာ။ တစ်ချို့ဆို ကျနော့် ကယက်လှေ အထိ ရေကူးလာကြတယ်။ ရေထဲမှာရှိတဲ့ အမိုက်တွေကောက်ရင် ပေးစီးမယ်ဆိုတော့၊ သူတို့ကောက်ပေးကြတယ်။ နောက် တွတ်ပီနဲ့ ကျနော် နှစ်ယောက်ပဲချန်ခဲ့တယ်။ ကျနော်တို့ ကမ်းနဲ့ ဝေးတဲ့နေရာကို လှော်ကြတယ်။ သူက ကျနော်နာမည်ကို မေးတယ်။ ကျနော် နာမည် သူ့ကို ပြောပြလိုက်တယ်။ ကမ်းပြန်ရောက်တဲ့ အထိ သူဘာမှ ပြန်မပြောဘူး။ ကမ်းပြန်ရောက်တော့ သူက ဘာပြောလဲဆိုတော့။
အကို့ နာမည်ကလည်း ဘာလို့ကြီးလဲဗျာ။ ပြီးတော့ အကိုဆီက English စော်နံတယ်တဲ့။
ကျနော်က နေလောင်ခံဆီ လိမ်းထားခဲ့တာကို။
အဲ့နေက်ပိုင်း ကျနော်လည်း ကယက်လှေ မစီးတော့ဘူး။ ဒီကလေးတွေ ရေနစ်ရင် ကျနော့် ကို အမူပတ်လာနိုင်တယ်မဟုတ်လား။
တစ်ရက် ကျနော် ငါးဖမ်းသမားအဖွဲ့တွေနဲ့ ထိုင်ပြီး စကားပြောနေတော့ တွတ်ပီရောက်လာတယ်။ mountain ဘီးလေးနဲ့။ သူ့သူငယ်ချင်းလည်းပါတယ်။
အကိုဆေးလိပ်သောက်လားတဲ့။
အင်း လို့ကျနော်ပြန်ဖြေလိုက်တယ်။ ကျနော့် လက်ထဲမှာ Esse change နဲ့။ မင်းကော သောက်လားဆို့တော့ သူရယ်တယ်။ ပြီးတော့ တစ်ခါတစ်လေတဲ့။ အသက်ဘယ်လောက်လဲ ကျနော်မေးတော့ ၁၂ နှစ်တဲ့။
ပန်းချီ စိတ်ဝင်စားလားတဲ့။ သူက နောက်ရက် မေးတယ်။ သူ့အိမ်မှာ ပန်းချီပြခန်းရှိတယ်တဲ့။ သူ့အဖေက တည်းခိုခန်း ဖွင့်တယ်ပြောတယ်။ ကျနော် မရောက်ဖြစ်ခဲ့။ ကျနော် အလုပ်ရတော့ မောင်တောကို သွားခဲ့တယ်။
တိုက်တိုက်ဆိုက် ကျနော် ဒီတစ်ခေါက်ပြန်ရောက်တော့လည်း august လပဲဖြစ်နေတယ်။ အသိတွေကို တွတ်ပီအကြောင်းမေးတော့ .. ဟာ.. ဒီကောင် ဆရာကြီးဖြစ်နေပြီတဲ့။ ဆေးလိပ်လည်းသောက်တယ်။ အရက်လည်းသောက်နေပြီတဲ့။
တစ်နေ့က ကျနော်သူကို ဗန်ဒါပင်အောက်မှာတွေ့တယ်။ သူ့သူငယ်ချင်းက ဘေးမှာ။ ထီးဆောင်းပြီးရပ်နေတယ်။ ကျနော်ကို မြင်တော့ တိုနေပြီဖြစ်တဲ့ စီးကရက် ကိုနောက်ဆုံးအနေနဲ့ အားရအောင် ဖွာလိုက်ပြီး ပစ်လိုက်တယ်။ သူ့ မျက်လုံးတွေ ရဲနေတယ်။ ဟေ့ယောင်၊ မင်းဝီသောက်ထားလားလို့ ကျနော်မေးတော့ ပြုံးပြီး ပြန်ကြည့်တယ်။ မင်းအိမ်ပြန်တော့ အအေးမိမယ်ဆိုပြီး သူ့ကို ပြန်ခိုင်းလိုက်တယ်။ စီးနေကြ စက်ဘီး မဟုတ်တော့ဘူး။ မော်တော်ဆိုင်ကယ် ဖြစ်သွားပြီ။
မနေ့က ပြန်တွေ့တယ်။ လက်ထဲမှာ knuckle four finger rings နဲ့။ ကိုယ်တိုင်လုပ်ထားတာတဲ့။ လက်ရာကတော့ မသေသတ်ပေါ့။ မနေ့က မတိုင်ခင်တစ်ရက်က အထိုးခံလာရတယ်လို့ သူ့ဘော်ဒါက ကျနော်ကို snitch လုပ်တယ်။ ဖိုက်တာကြီးဖြစ်နေပြီပေါ့ဆိုတော့ တွတ်ပီရယ်တယ်။ မင်းဝီသောက်လားဆိုတော့ တစ်ခါတစ်လေတဲ့။ အကို့မှာ နေ့တိုင်းဝီသောက် အင်္ကျီ ရှိတယ်ပြောတော့ ဝတ်လေ အကို့ကို ရဲဖမ်းမှာပေါ့တဲ့။
ရေမကူးတော့ဘူးလား မေးတော့၊ မကူးတော့ဘူးတဲ့။ အသက်ဘယ်လောက်ရှိပြီလဲမေးတော့ ၁၄ တဲ့။ ရည်းစား ရှိပြီလားလို့မေးတော့ ချက်ခြင်းပဲ ပြန်ဖြေတယ်။ ဟာ မရှိ။ မရှိ။ အလကား စိတ်ရူပ်စာရာတွေတဲ့။ ပြီးတော့ ကျနော်ကို ပြန်မေးတယ် အကိုကောတဲ့။ မရှိဘူးလို ကျနော်ပြန်ဖြေတော့ အကိုတော့ ရှိသင့်ပြီတဲ့။ ဘာဖြစ်လို့လဲမေးတော့ အကို အသက်ကြီးနေပြီတဲ့။
ဆယ်ကျော်သက်ဖြစ်လာပြီ ဆိုတော့ တွတ်ပီက ဆယ်ကျော်သက်အလုပ်တွေပဲ စိတ်ဝင်စားတော့တဲ့ပုံပဲ။ နားမှာ နားကွင်းနဲ့။ လက်ညိုးနဲ့ လက်ခလယ်မှာ တက်တူး ထိုးထားတယ် the end, and flames. Elon Musk ရဲ့ starlink ဆိုတာ တစ်ကယ်ကြီးလားတဲ့။ ဘယ်လို အလုပ်လုပ်တာလဲတဲ့။ Zuckerberg နဲ့ကော ဘယ်တော့ ထိုးမလဲတဲ့။
ဒီနေ့လည်း ပြန်တွေ့တယ်။ ဘောလုံးကန်ပြီ ကျနော်နဲ့ ရေလာကူးတယ်။